✅ Бүгін М.О. Әуезов атындағы Әдебиет және өнер институтының Қолжазба қоры құнды жәдігерлермен толыққанын қуана хабарлаймыз.

🖌️ Көзі тірісінде халықтың ерекше ықыласына бөленген айтыскер ақын, жазушы Есенқұл Жақыпбековтің қолжазба мұрасын әйелі Меңсұлу Нағашыбекова мен Үмбетәлі Кәрібаев әдеби-мемориалды музейінің ғылыми қызметкері Меруерт Әбішева ресми түрде қорға табыстады. Ақынның шалқар шабытымен дүниеге келіп, қағазға түскеннен кейін де өз қолымен бірнеше рет түзетілген, толықтырылған жазбалары шығармашылық адамының әр кездердегі эмоциялық көңіл-күйін, творчестволық өсу деңгейін байқататын көрсеткіш екені белгілі.

📚 Ақын Е. Жақыпбековтің 900-ден астам өлеңнен тұратын (одан бөлек прозалық шығармалары да бір төбе) шығармашылық лабораториясында мұндай қолжазбалар көптеп ұшырасады екен.

❇️ Іс-шараны жүргізген Институт бас директорының орынбасары, филол.ғ.к. Альмира Қайыртайқызы Қалиева жоғарыдағы мәселелер келешек мәтінтанушы мамандар үшін таптырмас зерттеу нысаны болатынын және де осы мұра Есенқұл ақынның шығармашылығын зерттеуге ниеттенген болашақ магистрлар мен докторлар үшін таптырмас қазына екендігін атап өтті.

🟢 Жиынға қатысқан Қолжазба және текстология орталығының директоры, филол.ғ.к. Жұмашай Рақыш, Тәуелсіздік дәуіріндегі әдебиет және көркем публицистика бөлімінің меңгерушісі, филол.ғ.д. Гүлжаһан Орда, Театртану және кино бөлімінің меңгерушісі, өнертану к. Амангелді Мұқан, фольклортанушы, филол.ғ.к. Сейілбек Сәкен ақынның жары Меңсұлу Нағашыбекова мен ақын мұрасын саралап, жүйелеген Меруерт Әбішеваға өз алғыстарын білдірді.