ССР Одағы халық шаруашылығын қалпына келтірудің және өркендетудің 1946–1950 жылдарға арналған бесжылдық жоспары совет ғалымдарының алдына жаңа міндеттер қойып отыр. Жоспарда көрсетілгсн түрлі жаңа өнеркәсіп орындары, теміржолдар, совхоздар, МТСтар, электр станциялары сияқты құрылыстардың көңілдегідей салынып бітуі, біткеннен кейін үздіксіз жұмыс атқаруы негізінен ғылым-техника қайраткерлерінің басшылығын, көмегін керек етеді.
Сталиндік жаңа бесжылдық жоспар бойынша елімізде істелетін жұмыстардың көлеміне қарағанда Қазақстан Советтер Одағында үшінші орын алып отыр. 1950 жылы Қазақстандағы өндіріс орындарының өнімі 1940 жылғы көлемінен екі жарым есе артпақ, оның ішінде көмір өндіру 134 процент, мұнай шығару 75 процент артуға тиіс. Сол сияқты, мыс өндірісі 2,6 есе, қорғасын өндірісі үш есеге жуық өспек. Республика шаруашылығының мұнан да ілгері дамуына негіз болатын қара металлургия, шойын, болат балқытатын, рельс, сым, табақ темір шығаратын үлкен заводтар салына бастамақ. Жаңа бесжылдықта Қазақстанда күрделі химия өнеркәсібі, машина жасайтын заводтар салынып, іске қосылмақ. Мойынты–Шу сияқты Қазақстанның оңы мен солын қосатын маңызды теміржолдар салынбақ. 1950 жылы республикамызда малдың саны 25 миллионнан артпақ. Егіс көлемі 7,3 миллион гектарға жететін болады. Міне, бұл күрделі міндеттерді іске асыру жолында жұмысшылар мен колхозшылар ғылым қайраткерлерімен тізе қосып, жұмыс істеулері қажет болады.
Республикамыздың ғылымы мен озат техникасының қара шаңырағы болатын – Қазақстанның Ғылым Академиясы төртінші бесжылдықта істейтін ғылыми-зерттеу жұмыстарын, ең алдымен, осы міндеттерге бағындырмақ. Академияның геология, кен шығару, кен балқыту, энергетика, химия институттары сияқты орындары өздерінің барлық жұмысын бесжылдық жоспарда белгіленген ғылыми-техникалық шараларды орындауға негіздеп отыр. Бұған алдымен Қарағанды, Екібастұз көмір ошақтары, кенді Алтай, Жезқазған, Балқаш сияқты түсті металл кендері, Атасу, Қарсақпай, Жезді, Аят сияқты темір, марганец металдарының кендері және олардың осылардай күрделі кен ордалары кіреді. Жердің топырағын, өсімдігін, жәндіктерін зерттейтін институттар мен мал шаруашылығын, медицина ғылымдарын зерттейтін институттар өздерінің жұмыстарында егін, мал шаруашылықтарының өнімін арттыру, республика шаруашылығына пайдалы жаңа өсімдіктер тектерін енгізу, өндірістегі жұмысшылардың денсаулық сақтау істерін нығайту жолдарын, шөл жерлерде салынған және салынатын завод, өндіріс орындарының жанынан су, астық базаларын тауып, іске қосу жолдарын және осы сияқты маңызды мақсаттарды көздеп отыр. Тіл, әдебиет, тарих, көркем-өнер, экономика, заң жүйелері сияқты мәселелерді зерттейтін институттар өздерінің ғылыми-зерттеу жұмыстарын қазақ халқының және Қазақстандағы ұйғыр, дүнген халықтарының әдебиет, тіл, тарих мұраларын зерттеуге, оларды түрі ұлттық мазмұны социалистік жолмен ілгері дамыту мақсатына негіздеп отыр.
Алға қойылған мақсаттарға жету жолында Қазақстанның Академиясы өзінің институттарының санын, сапасын, ғылыми қызметкерлерін күшейтумен қатар, жаңа бесжылдықта Қазақстанның ірі облыстары мен аудандарында өздерінің тұрақты бөлімдерін (филиал, базаларын) ашып, олар арқылы инженер, агроном, дәрігер, мұғалімдер сияқты жергілікті интеллигенция қайраткерлерін ғылым академиясы жүргізетін зерттеу жұмыстарына тартпақшы, баулымақшы. Олардың ішінен шығатын талапты ғылым қайраткерлерін өзінің негізгі ғылыми институттарына жұмысқа шақырып, ғылым жолында өсуіне көмек көрсетпек.
Ғылыми-зерттеу жұмыстарын халық шаруашылығына басшы және көмекші етумен бірге, Қазақстанның Ғылым Академиясы терең теория ғылымдарына да кең жол беріп, бүкіл Одақ көлеміндегі зерттеу бәйгесінде Қазақстан ғылымының ілгергі дәрежелі орын алуын мақсат етпек. Бұл үшін Қазақстанның ғылыми қызметкерлері Бүкіл Одақтық Ғылым Академиясымен байланысын мұнан да гөрі күшейтіп, атақты ғалымдардан үзбей үлгі өнеге алып отырулары керек.
Осы жылдың июнінде Қазақстанның Ғылым Академиясы ашылмақ. Оған негіз болатын Одақтық Ғылым Академиясының қазақ филиалы қазіргі кезде республикадағы күшті ғылым кіндігі болып отыр. Қазір қазақ филиалында 16 ғылыми зерттеу институты, олардың көлемінде жүзден артық лаборатория, музей, база сияқты ғылыми орындар бар. Бұларда 1600дей адам қызмет істейді. Мұның көбі қазақ ғылым қызметкерлері. Өткен заманда Қазақтан ғылым дәрежесіне ие болған бір адам жоқ еді. Қазірде коммунист партиясының, совет өкіметінің басшылығы арқасында, ұлы орыс халқының ғалымдарының көмегі арқасында қазақтың ондаған ғылым докторлары, жүздеген ғылым кандидаттары шығып, жемісті еңбек етуде. Жақсы өсіп келе жатқан көптеген жас ғалымдарымыз бар. Олардың саны мен сапасы үнемі артып отырмақ.
Одақтық өкіметтің ұйғаруы бойынша, Алматы қаласында биылдан бастап Қазақстанның ғылым академиясына арналған ғылыми институттердің үйлері салынады. Мұның бәрі де республикадағы ғылыми жұмыстардың маңызы келешекте де өршіп, өсіп отыруына дәлел. Қазақстан ғалымдары мұнан былай да өздерінің бар күшін, бар білімін сүйікті Отанының күш-қуаты артып, көркейе беруіне жұмсайды.