Мен өз өмірімдегі бұл аса маңызды документті – Сталиндік сыйлықтар лауреатының дипломын большевиктер партиясы мен Совет үкіметіне деген шексіз алғысқа бөленген сезіммен қабылдаймын.
Бұл документте Жезқазған ауданында мен басқарған геолог-барлаушылар коллективімен бірге істеген 15 жылдық творчестволық еңбегім қорытылып отыр. Бұл еңбектің нәтижесінде Жезқазған ауданы Қазақ республикасының аса қуатты, гүлденген индустриялық орталықтарының біріне айналды. Қазіргі Отан соғысы күндерінде, фашисттерге қарсы ерлік соғыс жүргізіп жатқан кезінде Қызыл Армияны қаруландыруда Жезқазған мысы мен Жезқазған марганецінің маңызы барған сайын күшейіп отырғанына, сөйтіп, жұмсалған еңбектің игілікті жеміс бергеніне қатты ризамын.
Жезқазғанның қойнындағы байлығын ашуда менімен бірге қажырлы еңбек еткен ескі достарымнан жалынды құттықтаулар алғанда, жүректі қуаныш кернейді. Қазір олар Ұлы Отан соғысының майдандарында, сүйікті отанымыздың намысы мен тәуелсіздігін төсін төсеп қорғауда.
Қазақстанның жер қойнындағы байлығы есепсіз мол. ССРС-та запас жағынан бірінші орын алатын мыс, қорғасын, хром, цинк, ванадия кендері Қазақстан жерінде. Мұнайдың, көмірдің, темірдің, марганецтің, никель мен қалайының, сирек кездесетін және асыл металдардың, тағы басқа толып жатқан минералдық шикізаттың запастары да орасан көп. Бұлардың бәрі де отан қорғауда, еліміздің халық шаруашылығын нығайтуда аса маңызды орын алады. Жер қойнындағы осы мол ресурстардың көп түрі қазір елімізді қорғауға жұмылдырылды, олар майданда гитлершіл шапқыншыларға қарсы снаряд, зеңбірек, танк, самолет болып жұмсалуда.
Қазақстанның ұлан-байтақ кең жері мал шаруашылығын өркендетуге, дәнді және техникалық егістер көлемін ұлғайтуға өте қолайлы. Колхозшылар аянбай еңбек ете отырып, жаратылыс байлығын игеруде, егіннен мол өнім алуда. Майданға республикамыздың ауыл шаруашылығының продуктылары үздіксіз жөнелтілуде.
Қазақстанның жабайы өсетін өсімдіктері мен айуанат ресурстарынан қосымша көп пайда шығаруға болады. Қазіргі отан соғысы күндерінде Қазақстанның ғалымдары үшін республикамыздың жер қойнындағы және жер бетіндегі есепсіз мол ресурстарын барлық жағынан зерттеп, оларды майдан керегіне тезірек жұмылдырудан ардақты, бұдан құрметті міндет жоқ.
Отанымыздың игілігі үшін, сұрқия фашист оккупанттарды жеңу күнін таянта түсу жолында қайсымыз болсақ та жұмысты барлық творчестволық күшімізді аянбай жұмсап істедік және істей береміз, барлық жігерімізбен, қажырлы қайратпен еңбек етеміз десем, мен бұл сөзім арқылы Қазақстанның бүкіл ғылыми қызметкерлерінің, бүкіл, советтік интеллигенциясының ой-пікірін білдіремін ғой деп ойлаймын.
Бұл жоғары наградты қабылдай отырып, мен Үкіметке және Партияға мынадай сенім беремін: Ғылым академиясының мен басқарған Қазақстандық филиалының ғылыми коллективімен бірге алдағы жұмысымда да өзімнің барлық күшімді, білімімді Қазақстанның барлық жаратылыс ресурстарын майдан керегіне, жексұрын неміс-фашист басқыншыларды біржолата талқандау ісіне барынша көп жұмылдыруға аянбай жұмсаймын.