Қымбатты бөбектер! Сіздер бүгін қуанышты көңілмен бірінші рет мектеп ашып, шәкірттер партасына отырасыздар. Кешегі күні асыр салып, тек ойынның ғана соңында жүрсеңдер, бүгін Кеңестер Одағының барлық азаматтарының қатарында Отанымыздың еңбекші халқының санына кірдіңіздер. Ата-аналарыңыз бен апа-ағаларыңыз сияқты сіздер де бұдан былай уақыттарыңызды тәртіпке салып, келешекте оқымысты маман болу үшін қажет білім алуға жұмыласыздар.
Ұлы Отанымыздың толық бағалы азаматы болу үшін, сіздер бүгіннен бастап білім мен еңбекті толық сүйіп, мүғалімдеріңіздің тілін алып, елгезек болып, үлкендерді сыйлап, мектеп тәртібін бұлжытпай орындап, қашанда, қайда болсын әдепті, таза жүруге үйренулеріңіз керек. Бар жүрекпен сіздерге саулық, шаттық, оқуда зеректілік тілеймін.